Санаи 4-уми декабри соли 2024 дар толори калони ДДТХ Конфронси илмӣ-амалии шуъбаи Агентии назорати давлатии молиявӣ ва мубориза бо коррупсияи Ҷумҳурии Тоҷикистон дар шаҳру ноҳияҳои минтақаи Кӯлоб дар якҷоягӣ бо Донишгоҳи давлатии тиббии Хатлон дар мавзӯи «Ташаккули фарҳанги зиддикоррупсионӣ - омили муҳими муқовимат ба коррупсия» бахшида ба Рӯзи байналмилалии мубориза бар зидди коррупсия баргузор гардид.

Дар ҳамоиши илмӣ як гурӯҳ ходимони  варзидаи сиёсию илмии кишвар,  намояндагони Мақомоти иҷроияи ҳокимияти давлатии ноҳияи Данғара, роҳбарони мақомотҳои ҳифзи ҳуқуқ, роҳбарони ташкилоту муассисаҳои ноҳияи Данғара ва кормандони шуъбаи Агентии назорати давлатии молиявӣ, мубориза бо коррупсияи Ҷумҳурии Тоҷикистон дар минтақаи Кӯлоб, омӯзгорон ва донишҷӯёни Донишгоҳи давлатии Данғара, ҳайати профессорону омузгорон ва донишҷӯёни Донишгоҳи давлатии тиббии Хатлон ширкат варзиданд.

Ректори Донишгоҳи давлатии тиббии Хатлон, д.и.т., профессор Убайдулло Қурбон бо сухани ифтитоҳӣ ва табрикотӣ Конфронсро ҳусни оғоз бахшида,  баргузории конфронси мазкурро муҳим арзёбӣ намуд.

Дар идома бо суханони табрикотӣ муовини раиси ноҳияи Данғара  Бегмурозода Даврон ва муовини якуми сардори шуъбаи Агентии назорати давлатии молиявӣ ва мубориза бо коррупсияи Ҷумҳурии Тоҷикистон дар шаҳру ноҳияҳои минтақаи Кӯлоб Бобозода Нуриддин Муссо баромад намуданд.

Сипас сардори бахши муқовимат ба коррупсияи шуъбаи Агентии назорати давлатии молиявӣ ва мубориза бо коррупсияи Ҷумҳурии Тоҷикистон дар шаҳру ноҳияҳои минтақаи Кӯлоб подполковники адлия Розиқзода Ҳасан дар мавзуи “Муқовимат ба коррупсия-омили муҳими ташаккул ва инкишофи низоми муосири идоракунии давлатӣ”, мушовири ректори ДДТХ оид ба масъалаҳои ҳуқуқӣ, профессори фахрии донишгоҳ Азизуллоев Амонулло Азизуллоевич дар мавзуи “Коррупсия – таҳдид ба рушди кишвар”, ассистенти кафедраи фанҳои ҷамъиятӣ, тарбиявӣ-сиёсӣ ва забонҳои Муассисаи давлатии таълимии «Коллеҷи оташнишонӣ-техникӣ»-и ВКД дар ноҳияи Данғара Абдулҳайзода Ҳусноро дар мавзуи «Сиёсати зиддикоррупсионӣ ва муқовимат ба коррупсия дар Ҷумҳурии Тоҷикистон», сардори Коллеҷи милитсияи ВКД Ҷумҳурии Тоҷикистон дар шаҳри Кӯлоб, подполковники милитсия Нуруллозода Меҳрулло дар мавзуи «Ташаккули фарҳанги зиддикоррупсионӣ дар муассисаҳои таълимӣ-кафолати омодасозии кадрҳои баландихтисоси ватандӯст”, дотсенти кафедраи сиёсатшиносӣ ва идораи давлатии Донишгоҳи давлатии Данғара Қодирзода Саидмуссо Муҳибулло дар мавзуи “Ҷойгоҳи давлати иҷтимоӣ дар мубориза бо коррупсия ва такмили тадбирҳои идораи сиёсӣ дар мақомоти ҳокимияти давлатӣ”, мудири кафедраи забони давлатӣ ва забонҳои муосири хориҷии Донишкадаи технологӣ ва менеҷменти инноватсионии шаҳри Кӯлоб Боронова Рухшона Абдурасуловна дар мавзуи «Хавфҳои коррупсионӣ дар системаи таҳсилоти олии кишвар ва роҳҳои коҳиш додани он» маърузаҳои илмиро пешниҳоди иштирокчиён намуданд.

Пас аз баррасии маъруза ва муҳокимаи онҳо конфронс ба анҷом расид ва дар анҷоми он аз ҷониби ҳунармандони Театри ҷумҳуриявии мусиқӣ - драмавии Данғара намоишномаи театрӣ таҳти унвони «Адолат» пешниҳоди ҳозирин гардонида шуд.

Хабарнигори сомона.