Санаи 22-юми сентябри соли 2024 ҳайати Донишгоҳи тиббии Шинҷони Ҷумҳурии Мардумии Чин таҳти роҳбарии Ректори донишгоҳи мазкур профессор Ҳоҷиакбар Айса ба Донишгоҳи давлатии тиббии Хатлон ташриф овард. Ректори Донишгоҳи тиббии Шинҷони Ҷумҳурии Мардумии Чинро Президенти Ассотсиатсияи байналмилалии мубодила ва таблиғоти тиббӣ ва тандурустии Чин ва ҳамзамон, Академики Академияи муҳандисии Чин профессор Хан Демин, муовини директори Маркази кашф ва рушди маводи мухаддири Осиёи Марказӣ дар Академияи илмҳои Чин, Ph.D., хонум Чжао Тсзянюй, мудири кафедраи химияи органикии Донишгохи давлатии Самарқанд, д.и.х., профессор Хуршед Бозоров ва намояндагони Ҷумҳурии Тоҷикистон - директори Маркази инноватсионии Хитою Тоҷикистон оид ба маҳсулоти табиии Академияи миллии илмҳои Тоҷикистон, д.и.х., Содиқ Нуъмонов, ходими калони илмии Маркази инноватсионии Хитою Тоҷикистон оид ба маҳсулоти табиии Академияи миллии илмҳои Тоҷикистон, н.и.ф. Исомиддин Гулмуродов ҳамроҳӣ доштанд.

Ҳадафи ҳайати Донишгоҳи тиббии Шинҷони Ҷумҳурии Мардумии Чин ба ДДТХ ин аз наздик шинос шудан бо шароиту имкониятҳои таълимию таҷрибавӣ ва тавсеа бахшидани ҳамкориҳои судманди байни ду донишгоҳ мебошад.

Ҳайати меҳмононро профессор Убайдулло Қурбон ва аъзои Раёсат дар даромадгоҳи Бинои асосии донишгоҳ пешвоз гирифтанд ва тибқи хатсайр меҳмононро бо синфхонаҳои намунавӣ, китобхонаи электронӣ, толори хониши китобхона ва Маркази омӯзиши симулятсионӣ шинос намуданд.

Сипас, дар толори Шурои олимон вохӯрии ҳайати Донишгоҳи тиббии Шинҷони Ҷумҳурии Мардумии Чин бо Роҳбарияти донишгоҳ ва аъзои Раёсат сурат гирифт. Ректори ДДТХ профессор Убайдулло Қурбон пас аз сухани муқаддимавӣ аз фаъолияти 8-солаи донишгоҳ, имконияту шароит, дастовардҳо ва ҳамкориҳои судманди донишгоҳ маълумот пешниҳод намуд. Инчунин, аз муносибатҳои дӯстонаи Ҷумҳурии мардумии Чин бо Ҷумҳурии Тоҷикистон ва кумакҳои башардӯстона, бахусус, дар соҳаи тандурустии кишвар, ёдоварӣ намуд.

Дар навбати худ, Президенти Ассотсиатсияи байналмилалии мубодила ва таблиғоти тиббӣ ва тандурустии Чин ва ҳамзамон, Академики Академияи муҳандисии Чин профессор Хан Демин аз ҷониби ҳайат суханронӣ намуда, нахуст барои пазироии гарму самимӣ ба Роҳбарияти донишгоҳ изҳори сипос намуд. Ҳамзамон, аз муносибатҳои ду кишвари дӯст, ҳамкориҳои судманди ду донишгоҳ, таҷҳизоту технологияи муосири тиббӣ, беморхонаҳои наву замонавӣ ва тавсеа бахшидани ҳамкориҳо дар соҳаи тандурустӣ ибрози андеша намуд.

Дар фарҷомӣ вохӯрӣ, дар вазъияти тантанавӣ Ректори Донишгоҳи тиббии Шинҷони Ҷумҳурии Мардумии Чин ба унвони «Профессори фахрии Донишгоҳи давлатии тиббии Хатлон» сазовор гардонида шуд.

Вохӯрии ҳайати Донишгоҳи тиббии Шинҷони Ҷумҳурии Мардумии Чин бо Донишгоҳи давлатии тиббии Хатлон дар сатҳи баланд доир гардида, ҳамкориҳои тарафайн минбаъд боз ҳам бештар ба роҳ монда хоҳанд шуд.

Хабарнигори сомона.