Дар асоси нақша-чорабиниҳои Раёсати Донишгоҳи давлатии тиббии Хатлон оид ба баргузории идҳои баҳорӣ санаи 15-уми марти соли 2019 дар кафедраи забонҳо озмуни “Гулбазми наврузӣ” баргузор карда шуд. Дар озмун 5 нафар донишҷӯён: Аминова Шабнам - донишҷӯи курси якуми гурӯҳи 105-и педиатрӣ, Ҳусейнова Шоҳсана - донишҷӯи курси дуюми гурӯҳи 203-и тиббӣ, Давлатова Нилуфар - донишҷӯи курси дуюми гурӯҳи 204-и тиббӣ, Шукронаи Рамазон - донишҷӯи курси сеюми гурӯҳи 301-и педиатрӣ ва Эмомова Муборак - донишҷӯи курси сеюми гурӯҳи 305-и педиатрӣ иштирок намуда, вобаста ба шартҳои озмун маҳорат ва ҳунару истеъдоди худро нишон доданд.
Мақсади асосии баргузор намудани озмуни “Гулбазми наврӯзӣ” ин бошукӯҳ ҷашн гирифтани иди Наврӯз ва ҳамзамон дарёфт кардани истеъдодҳо ва чеҳраҳои нави ҳунар, ки маҳорати баланди суханварӣ, шеърхонӣ ва рақсу сурудхонӣ доранд, мебошад.
Озмун бо сухани ифтитоҳии аъзои кумитаи тадорукот оғоз гардид. Иштирокчиён тавонистанд шартҳои озмуни мазкурро дар сатҳи баланд иҷро намоянд. Ҳайати ҳакамон таҳти роҳбарии Сарвари китобхонаи ДДТХ - Саидова М. Р. тамоми ҳусну қубҳи баромади иштирокчиёнро мавриди таҳлилу баррасӣ қарор дода, ғолиби озмунро муайян намуданд. Эмомова Муборак - донишҷӯи курси сеюми гурӯҳи 305-и педиатрӣ бо гирифтани 72 хол соҳиби ҷои аввал гардид.
Озмун дар як фазои дӯстиву хурсандӣ баргузор гардида, барои боз ҳам тақвият додани донишу маҳорат ва истеъдоду малака ба донишҷӯён таъсири мусбии худро расонид.
Кафедраи забонҳо
