English
Хабарҳои ДДТХ (1017)
ВОХӮРӢ БО ҲПО ВА ДОНИШҶӮЁНИ ДДТХ ДАР ДОИРАИ ЭЪЛОН ГАРДИДАНИ “СОЛИ МАЪРИФАТИ ҲУҚУҚӢ”
Чуноне ки маълум аст, аз ҷониби Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар Паёми навбатӣ соли 2024 “Соли маърифати ҳуқуқӣ” эълон гардид. Дар партави ин дастури Пешвои муаззами миллат мақомоти иҷроияи ҳокимияти давлатии вилояти Хатлон тасмим гирифт, ки бо муаасисаҳои олӣ ва миёнаи касбии воқеъ дар ҳудуди вилоят, намояндагони фаъоли шаҳру ноҳия ва дигар табақақои ҷомеа суҳбату вохӯриҳо доир намояд.
Дар ин радиф, санаи 25-уми апрели соли 2024 дар Донишгоҳи давлатии тиббии Хатлон чунин вохӯрӣ бо иштироки Сардори Раёсати маорифи вилоят муҳтарам Сафарзода Ғ., сардори Раёсати кор бо ҷавонон ва варзиши вилоят Насриддинзода Р., Сардори Раёсати кор бо занон ва оилаи вилоят Абдуллозода Ф. бо ҳайати профессорону омӯзгорон, донишҷӯён ва кормандони донишгоҳ доир гардид.
Вохӯриро муовини аввали ректори ДДТХ дотсент Аҳмадиён Ш.Р. ҳусни оғоз бахшида, мақсад аз баргузории чунин суҳбату вохӯриҳоро ба иттилои ҳозирин расонид.
Сипас дар навбати худ Сардори Раёсати маорифи вилоят Сафарзода Ғ., сардори Раёсати кор бо ҷавонон ва варзиши вилоят Насриддинзода Р., Сардори Раёсати кор бо занон ва оилаи вилоят Абдуллозода Ф. ба сухан баромада, аз эълон намудани Соли маърифати ҳуқуқӣ, муҳиммияти донистани ҳуқуқу озодиҳои шаҳрвандӣ, риояи қонуну қоидаҳои амалкунанда, ташаккул додани маърифати ҳуқуқии ҳар як шаҳрванди ҷумҳурӣ ва ҳиссагузор будани донишҷӯён – ҷавонони кишвар дар ин ибтикори навбатии Пешвои миллат, суханронӣ намуданд.
Дар ҷамъбасти вохӯрӣ муовини аввали ректори ДДТХ дотсент Аҳмадиён Ш.Р. аз баргузории чунин суҳбату вохӯриҳои судманд ба намояндагони мақомоти иҷроияи ҳокимияти давлатии вилояти Хатлон аз номи роҳбарияти донишгоҳ ва иштирокчиён изҳори сипос намуд.
Хабарнигори сомона.
КАБУДИЗОРКУНИИ ГИРДУ АТРОФИ ДОНИШГОҲ ИДОМА ДОРАД
Санаи 1-уми майи соли 2024, бо ибтикор ва дастгирии бевоситаи Вазири тандурустӣ ва ҳифзи иҷтимоии аҳолии Ҷумҳурии Тоҷикистон муҳтарам Абдуллозода Ҷамолиддин Абдулло, ҷиҳати идомаи кабудизоркунӣ ва сабзгардонии гирду атрофи Донишгоҳи давлатии тиббии Хатлон, зиёда аз 100 адад арчаҳои ороишӣ ба донишгоҳ дастрас ва шинонида шуданд.
Лозим ба қайди хос аст, ки пас аз сохта ба истифода дода шудани Бинои асосии Донишгоҳи давлатии тиббии Хатлон бо супориши бевоситаи Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон аз ҷониби кормандони МД "Маҷмааи Қасри Миллат"-и ДИП ҶТ бо намояндагии сардори шуъбаи "Боғи Парчами давлатии Ҷумҳурии Тоҷикистон"-и МД "Маҷмааи Қасри Миллат"-и ДИП Ҷумҳурии Тоҷикистон моҳи ноябр ба донишгоҳ 271 адад дарахтони ороишӣ, ки 122 ададро дарахтони арча (Сосна)-и баландиашон аз 5 то 6 метр, 76 ададро дарахтони арча (Сосна)-и баландиашон аз 4 то 5 метр, 65 ададро дарахтони арча (Сосна)-и баландиашон то 4 метр ва 8 ададро дарахтони ороишии навъи "акатсия" бо андозаҳои гуногун ташкил медод, оварда шинонида шуданд.
Ин тадбирро Вазорати тандурустӣ ва ҳифзи иҷтимоии аҳолии Ҷумҳурии Тоҷикистон идома дод ва дарахтони ороишии дастрасгардида бо ҷалби Раёсати донишгоҳ, кормандони муовинати хоҷагидорӣ ва донишҷӯёни донишгоҳ шинонида шуданд.
Раёсати Донишгоҳи давлатии тиббии Хатлон аз дастгириҳои навбатии Вазорати тандурустӣ ва ҳифзи иҷтимоии аҳолии Ҷумҳурии Тоҷикистон, бахусус Вазири тандурустӣ ва ҳифзи иҷтимоии аҳолии Ҷумҳурии Тоҷикистон муҳтарам Абдуллозода Ҷамолиддин Абдулло изҳори сипос менамояд.
Хабарнигори сомона.
ҶАЛАСАИ НАВБАТИИ ШУРОИ ОЛИМОН
Санаи 27-уми апрели соли 2024 ҷаласаи навбатии Шурои олимон баргузор гардид. Пас аз ифтитоҳи расмии ҷаласа ва шинос намудани аъзо бо рӯзнома, Раиси Шурои олимон д.и.т., профессор Убайдулло Қурбон мудири кафедраи беҳдошт ва эпидемиология н.и.т. Насрединов А.А.-ро бо ҷашни 65 солагии зодруз, муовини ректор оид ба таълим ва корҳои методӣ, н.и.с. Аҳмадиён Ш.Р. ва муовини ректор оид ба тарбия ва фарҳанг н.и.ф. Қурбонмамадов С.Х.-ро барои ноил шудан ба унвони илмии "Дотсент", мудири кафедраи забонҳо Одинаев С.-ро барои ноил шудан ба дараҷаи имлии "Номзади илмҳои филологӣ" аз номи аъзои шурои олимон табрику таҳният намуд.
Сипас тибқи рӯзнома дар масъалаи якум муовини раиси Комиссияи татбиқи Қонуни Ҷумҳурии Тоҷикистон «Дар бораи танзими анъана ва ҷашну маросим дар ҶТ" дар ДДТХ - Азизуллоев А.А. баромад намуда, аз корҳои фаҳмондадиҳӣ байни кормандону донишҷӯён ва пешгирӣ аз ҳолатҳои қонунвайронкунӣ дар ин ҷода маълумот дод.
Дар масъалаи дуюми рӯзнома мудири кафедраи физиологияи нормалӣ ва физиологияи патологӣ Назаров Ҷ.Т. оид ба фаъолияти кафедра дар соли таҳсили 2023-2024 маълумот пешниҳод намуд.
Дар масъалаи сеюми рӯзнома «Ҳисобот оид ба фаъолияти кафедраи педиатрӣ, мушкилот ва дурнамои он" аз ҷониби мудири кафедра н.и.т., дотсент Кузибаева Н.К. шунида шуд. Ҳамзамон, пас аз пешниҳоди ҳисобот ҳайати Комиссияи санҷишӣ аз фаъолияти панҷсолаи кафедраи мазкур маълумотро манзури аъзо гардонда, фаъолияти кафедраро қаноатбахш арзёбӣ намуд.
Дар масъалаҳои ҷорӣ бошад як қатор лоиҳаи қарорҳо пешниҳод ва аз ҷониби аъзои шурои олимон тасдиқ карда шуданд.
Хабарнигори сомона.
БАРГУЗОРИИ ЧОРАБИНИҲОИ ИЛМӢ БАХШИДА БА "ҲАФТАИ ИЛМ ДАР ДОНИШГОҲ"
Бо ибтикори муовинати илм ва нашрия, аз 15-ум то 22-юми апрели соли 2024, бахшида ба ҳафтаи илм дар кафедраҳои Донишгоҳи давлатии тиббии Хатлон мизҳои мудаввар, семинару ҳамоиш ва чорабиниҳои гуногуни илмӣ ташкил ва баргузор карда шуданд.
Санаи 17-уми апрели соли 2024 дар кафедраи фанҳои ҷомеашиносӣ дар мавзуи “Бардоштҳо аз "Мулоқоти Асосгузори сулҳу ваҳдати миллӣ, Пешвои миллат бо фаъолон, намояндагони ҷомеа ва ходимони дини кишвар”" мизи мудаввар ташкил ва гузаронида шуд. Дар мизи мудаввар омӯзгорон ва донишҷӯёни курсҳои якум ва дуюм иштирок намуданд. Мизи мудаввар таҳти роҳбарии мудири кафедра н.и.ф. Гулов А.А. доир гардида, пас аз маърузаҳои омӯзгорони кафедра суҳбати озод ва саволу ҷавоб байни маърузачиён ва иштирокчиён сурат гирифт.
Санаи 18-уми апрели соли 2024 дар кафедраи забонҳо дар доираи ҳафтаи илм дар мавзуи “Забони тоҷикӣ ва аҳаммияти таърихии он” ҳамоиши илмӣ ташкил ва гузаронида шуд. Мудири кафедра н.и.ф. Одинаев С.П. дар оғози ҳамоиш аз бузургию шаҳомати забони тоҷикӣ ҳарф зада, иброз дошт, ки забони тоҷикӣ дар паҳнои таърих яке аз забонҳое ба шумор меравад, ки аз замонҳои қадим то имрӯз салосату нафосат ва бузургию шаҳомати худро аз даст надодааст. Маърузачиёни дигар низ дар навбати худ оид ба мавқеи таърихии забони тоҷикӣ ибрози назар намуданд.
Ҳамчунин, санаи 18-уми апрели соли 2024 дар кафедраи химия ва биологияи тиббӣ мизи мудаввар дар мавзуи “Даҳсолаи байналмилии об, амал барои рушди устувор” мизи мудаввар бо иштироки омӯзгорону донишҷӯён доир карда шуд. Дар идомаи ин, бахшида ба “Рӯзи умумиҷаҳонии замин” 20-апрели соли 2024 дар кафедраи мазкур маҳфили илмӣ баргузор карда шуд.
Чорабиниҳои зикршуда дар доираи нақша-чорабиниҳои муовинати илм ва нашрия бахшида ба ҳафтаи илм баргузор гардиданд ва дар ташаккул додан ва роҳнамои намудани донишҷӯёну омӯзгорони ҷавон дар ҷодаи илм нақши муассире хоҳанд гузошт.
Муовинати илм ва нашрия.
МИЗИ МУДАВВАР БАХШИДА БА “БАРНОМАИ ПЕШГИРИИ ФАРБЕҲӢ ВА ТАШАККУЛИ ҒИЗОИ СОЛИМ ДАР ҶУМҲУРИИ ТОҶИКИСТОН БАРОИ СОЛҲОИ 2019-2024”
Дар доираи чорабиниҳои ҳафтаи илмии МДТ “Донишгоҳи давлатии тиббии Хатлон” санаи 18-уми апрели соли 2024 дар кафедраи физиологияи нормалӣ ва патологии ДДТХ мизи мудаввар бахшида ба “Барномаи пешгирии фарбеҳӣ ва ташаккули ғизои солим дар Ҷумҳурии Тоҷикистон барои солҳои 2019-2024” баргузор гардид. Масъулони мизи мудаввар: мудири кафедраи физиологияи нормалӣ ва патологӣ Назаров Ҷ.Т., мудири кафедраи анатомияи патологӣ, гистология ва тибби судӣ н.и.т. Алиев А.А. ва роҳбарии маҳфил ассистенти кафедра Аюбҷонова Ш.Н. дар маъруза ва баромади худ мақсади баргузории мизи мудаввар ва ба ин васила тарғиби пешгирии фарбеҳӣ ва ташаккули ғизои солим дар байни донишҷӯён, омӯзгорон ва аҳли ҷомеаро иброз намуданд.
Дар раванди баргузории чорабинӣ филмҳои кутоҳ ва презентатсияҳо пешниҳод гардида, ҳамзамон, саволу ҷавоб оид ба пешгирӣ аз фарбеҳӣ ва истифодаи дурусти ғизо байни иштирокчиён сурат гирифт.
Кафедраи физиологияи нормалӣ ва патологии ДДТХ.
ҶАЛАСАИ НАВБАТИИ “ҶАМЪИЯТИ ИХТИРОЪКОРОН ВА ФАЪОЛИЯТИ РАТСИОНАЛИЗАТОРӢ”
Дар доираи чорабиниҳои ҳафтаи илми МДТ “Донишгоҳи давлатии тиббии Хатлон” санаи 6-уми апрели соли 2024 ҷаласаи навбатии “Ҷамъияти ихтироъкорон ва фаъолияти ратсионализаторӣ” ҷиҳати баррасӣ ва тасдиқ 2 адад пешниҳодҳои ратсионализаторӣ баргузор гардид. Пешниҳодҳои ратсионализаторӣ мавзуъҳои “Тарзи гирифтани трансплантати пӯсти бутунқабата барои рӯйпӯш кардани дефектҳои пӯстӣ” (муаллифон Қурбонов У.А., Саидов И.С., Холов Ш.И., Муродов Ҷ.К., Дадоҷонов Ҷ.Ю.) ва “Ташхиси ултрасадоии пайдошавии остеоартрози банди зонуҳо”-ро (муаллифон Айниев Б.С., Азизова З.Д., Асоев С.П., Каримов Д.А.) фаро гирифтан буданд, ки аз мавзуъҳои мубрами тибби муосир ба шумор мераванд. Ҳар ду пешниҳоди ратсионализаторӣ аз тарафи ҳайати ҷамъият мусбат баҳогузорӣ гардида, мавриди тасдиқ қарор гимрифтанд.
Муовинати илм ва нашрия.
БАРГУЗОРИИ ЛЕКСИЯИ ПРОФЕССОРОНИ ДОНИШГОҲИ ДАВЛАТИИ ТИББИИ ОМСКИ ФЕДЕРАТСИЯИ РУСИЯ ВА ДОНИШГОҲИ ТИББИИ ҚАРАҒАНДАИ ҶУМҲУРИИ ҚАЗОҚИСТОН БАРОИ ДОНИШҶӮЁНИ ДДТХ
Бо мақсади дар амал татбиқ намудани ҳамкориҳои судманди байналмилалӣ миёни Донишгоҳи давлатии тибии Хатлон бо дигар донишгоҳҳои тиббии хориҷи кишвар ва иҷрои бандҳои созишномаҳои қаблан имзошуда аз санаи 1-уми апрел то 8-уми апрели соли 2024 барои донишҷӯёни курсҳои болоӣ аз фанҳои клиникӣ лексияи се нафар мутахассисони варзида аз Донишгоҳи давлатии тиббии Омски Федератсия Русия ва як нафар аз Донишгоҳи тиббии Қарағандаи Ҷумҳурии Қазоқистон доир гардид.
Зикр бояд кард, ки барои донишҷӯёни курси 6-уми факултети педиатрӣ лексия аз фанни «Бемориҳои кӯдакона» аз ҷониби муовини ректор оид ба корҳои таълимӣ, мудири кафедраи педиатрияи госпиталӣ бо курси маълумоти иловагии касбии Донишгоҳи давлатии тиббии Омски Федератсия Русия, н.и.т., профессор Павлинова Елена Борисовна, аз фанни «Бемориҳои дарунӣ» барои донишҷӯёни курси 6-уми факултети тиббӣ аз ҷониби мудири кафедраи тибби реабилиталӣ бо маълумоти иловагии касбии Донишгоҳи давлатии тиббии Омски Федератсия Русия н.и.т., профессор, Ахмедов Вадим Адилевич ва аз фанни «Акушерӣ ва гинекологӣ» барои донишҷӯёни курси 6-уми факултети тиббӣ аз ҷониби мудири кафедраи акушерӣ ва гинекологии №1-и Донишгоҳи давлатии тиббии Омск, н.и.т., дотсент Савелева Ирина Вячеславовна давоми ду рӯз идома ёфт.
Лексия аз фанни «Бемориҳои ҷарроҳӣ» барои донишҷӯёни курсҳои 4-ум, 5-ум ва 6-уми факултети тиббӣ ва педиатрӣ бошад, аз 1-ум то 8-уми апрел сурат гирифта, аз тарафи ёвари профессори кафедраи бемориҳои ҷарроҳии Донишгоҳи тиббии Қарағанда, табиб-ҷарроҳ, колопроктолог Эргешов Руслан Хадиматович доир карда шуд.
Намояндагони Донишгоҳи давлатии тиббии Омски Федератсия Русия ва Донишгоҳи тиббии Қарағандаро Ректори Донишгоҳи давлатии тиббии Хатлон, д.и.т, профессор Убайдулло Қурбон расман ба ҳузур пазируфта, аз ҳамкориҳои судманд бо донишгоҳи мазкур изҳори қаноатмандӣ намуд. Дар навбати худ, намояндагон низ аз пазироии самимӣ ва ташкили имконияту шароити мусоид миннатдории худро ба роҳбарияти донишгоҳ иброз намуданд.
Шуъбаи равобити байналмилалӣ.
МАҲФИЛИ ИЛМӢ-АДАБӢ ТАҲТИ УНВОНИ “ЗАХИРАИ ХОРАЗМШОҲӢ”-И ИСМОИЛИ ҶУРҶОНӢ - ШОҲАСАРИ БУЗУРГИ НИЁГОН”
Санаи 28-уми март бо ибтикори маъмурияти китобхонаи донишгоҳ бахшида ба шоҳасари бузурги ниёгон “Захираи Хоразмшоҳӣ” маҳфили илмӣ-адабӣ дбаргузор гардид. Маҳфилро бо сухани ифтитоҳи муовини ректор оид ба илм, н.и.т., дотсент Боронов Ҳ.А. оғоз намуд ва бузургиву манзалати ин асар, аз ҷумла барои соҳаи тибро арзёбӣ намуд.
Мудири китобхона Ҳалимов М.А. дар маърузаи худ оид ба раванди таҳия, баргардон ба хати криллӣ, ба чоп омода намудани асари мазкур, ҳайати таҳририя, муҳаррири масъул ва дигар масъалаҳои марбут ба асари “Захираи Хоразмшоҳӣ” сухан намуд.
Инчунин дар маҳфил аз ҷониби мудири кафедраи фанҳои ҷомеашиносӣ н.и.ф., дотсент Гулов А.А. дар мавзуи “Захираи Хоразмшоҳӣ-эҳёгари соири улум””, мудири кафедраи забонҳо н.и.ф. Одинаев С.П. дар мавзуи “Исмҳои ҷамъбандӣ дар “Захираи Хоразмшоҳӣ”", мудири кафедраи Бемориҳои ҷарроҳӣ н.и.т., Холов А.Д. дар мавзуи “Захираи Хоразмшоҳӣ-роҳнамо дар табобати омосҳо”, омӯзгори кафедраи анатомияи нормалӣ н.и.ф., Сангова Ҳ.Р. дар мавзуи “Манфиату мазаррати хобу бедорӣ аз нигоҳи Исмоили Ҷурҷонӣ”, омӯзгори кафедраи фанҳои ҷомеашиносӣ н.и.ф., Саидова М.Р. дар мавзуи “Илми тиб аз нигоҳи Исмоили Ҷурҷонӣ” бо маърӯзаҳои ҷолиб баромад намуданд.
Дар фарҷом муовини ректор оид ба илм ва нашрия дотсент Боронов Ҳ.А. кори маҳфилро қаноатбахш арзёбӣ намуда, бори дигар муҳиммияти ин асарро барои соҳаи тиб ва табибон таъкид намуд ва аз баргузории чунин маҳфил ба масъулон изҳори сипос кард.
Китобхонаи донишгоҳ.
