Ҳар як инсон ба ду навъи ғизо зарурат дорад - ғизои моддӣ ва ғизои маънавӣ. Барои ғизои маънавӣ донишҷуён паси курсӣ дар китобхона  ва дар  дарсҳо нишаста сабақ мегиранд, барои ғизои моддӣ бошад, солим гардонидани руҳу ҷисми онҳо зарур аст, яъне ба қавли Ибни Сино:«Агар хоҳед, ки шуморо ба табиб зарурат набошад, ба варзиш машғул шавед». Дар ин росто мувофиқи супориши раёсати донишгоҳ бахшида ба рӯзи Конститутсияи ҶТ, мусобиқаи варзишӣ аз рӯи  намуди футбол  байни донишҷӯёни факултаҳои ДДТХ ба нақша гирифта шуд.

      Низомнома ва тартиби гузаронидани бозии футбол таҳия карда шуда, аз 24-уми октябр то 7-уми ноябри соли 2016 мусобиқаи футбол байни дастаҳои факултетҳо дар майдони варзишии ДДТХ баргузор гардид. Дар мусобиқа 12 дастаи факултаҳои тиббӣ, педиатрӣ ва стоматологӣ иштирок намуданд.  Ба бозии финалӣ дастаҳои гурӯҳҳои 7-8-уми тиббӣ ва 3-4уми тиббӣ роҳ ёфтанд. Баъди баргузории бозии финалӣ дастаи гурӯҳҳои 7-8-уми тиббӣ ҷойи якум, дастаи гуруҳҳои  3-4уми тиббӣ ҷойи дуюм ва дастаҳои гурӯҳҳои 5-6-уми тиббӣ ва 1-2-и тиббӣ ҷойи сеюмро ишғол намуданд. Дар ҷамъбасти мусобиқа муовини ректор оид ба таълим Ғафуров Б.А., раиси иттифоқҳои касабаи кормандону донишҷӯён Мамадалиева С.А. иштирок намуда, ғолибони мусобиқаро бо туҳфаҳои хотиравӣ ва ифтихорнома сарфароз намуданд.

   Мақсади   ташкили  бозиҳо  дар байни донишҷӯён  бедор намудани ҳисси масъулият, ҳамдигарфаҳмӣ ва пурқувваттар намудани  дӯстию бародарӣ дар байни онҳо мебошад. Ҳамзамон донишҷӯён   варзиш, ҳаёти солим, муҳити солимро пайгирӣ   намуда, аз амалҳои ғайриахлоқӣ дурӣ ҷӯянд. Дар оянда низ дар ҷамъият  адои вазифа намуда, мутахасисони хубу солим  ба воя бирасанд, дар байни ҷомеа соҳиби обрӯю мартабаи баланд гарданд ва ба давлату миллати худ хизмати сазовор намоянд.

Нуров Маъруф – донишҷӯи гурӯҳи 10-уми факултети тиббии ДДТХ